Shorti i fazës së tretë, Vllaznia ka ende shpresa për kthim të situatës

211

Me mbarimin e ndeshjeve të fazës së dytë të kampionatit, është përcaktuar përfundimisht edhe renditja e skuadrave dhe njëkohësisht kalendari i fazës së tretë të kampionatit.Vllaznia e renditur e nënta, ka mësuar edhe kundërshtarët teksa siç dihet 6 ndeshje do ketë në transfertë dhe vetëm 5 në Shkodër, ngaqë bën pjesë në gjashtëshen e dytë të skuadrave. Duke e parë kalendarin, kuqeblutë do luajnë në Kukës, në Laç, në Lushnjë, Krujë, në kryeqytet me Tiranën dhe në ndeshjen e parafundit me Besën në Kavajë. Mundësia për të marrë pikë ekziston në çdo ndeshje por kuptohet që vëmendja kryesore duhet të jetë e përqendruar tek sfida e javës së 27-të në Lushnjë, ndaj skuadrës vendase e cila rrezikon shumë rënien. Më pas, duhet tentuar patjetër marrja e pikëve në Krujë me Kastriotin, edhe kjo një skuadër thuajse e rënë nga kategoria, po ashtu edhe ndaj Tiranës dhe sidomos në ndeshjen e parafundit me Besën. Nëse ndodh që të marrë 6 apo shtatë pikë në ndeshjet në transfertë, do ishte një mrekulli. Sa i takon ndeshjeve që do të luajë në “Loro Boriçi”, ajo do presë në javën e 24-të, pra të shtunën që vjen Partizanin. Ky i fundit pretendon Europën megjithatë referuar ndeshjeve që Vllaznia ka zhvilluar me këtë ekip, patjetër që duhet ta mundë. Më pas, do jetë mysafir që deri në fund të marsit mund ta ketë hipotekuar titullin dhe në Shkodër mund të vijë pa shumë pretendime. Rradha për të luajtur në “Loro Boriçi” do jetë pastaj për Bylisin, Flamurtarin dhe në javën e fundit me Teutën. Në kushte të tilla, nuk përjashtohet mundësia që të merren të plota 15 pikët dhe nëse ndodh kështu, me 45 apo 46 pikë në fund të kampionatit, skuadra shkodrane mund të jetë e shpëtuar. Por a mund të ndodhë kështu vërtetë? Këtë e di skuadra. Ja kalendari i fazës së tretë:
Faza e tretë:
J23- 12 mars    Kukesi-Vllaznia
J24- 15 mars    Vllaznia-Partizani
J25- 22 mars    Laçi-Vllaznia
J26- 29 mars    Vllaznia-Skendebeu
J27- 05 prill    Lushnja-Vllaznia
J28- 12 prill    Vllaznia-Bylis
J29- 19 prill    Kastrioti-Vllaznia
J30- 26 prill    Tirana-Vllaznia
J31- 30 prill    Vllaznia-Flamurtari
J32- 03 maj    Besa-Vllaznia
J33- 10 maj    Vllaznia-Teuta

© vllaznia.al